Салық декларациясын бірінші рет тапсырып жатсаңыз, мемлекеттік кірістер департаментіндегі мамандардан кеңес алыңыз.
Облыстық салық қызметінің өкілдері Ерболат Ғаббасов пен Гүлнар Тюлубаева @pavlodar.rsk алаңында декларациялаудың қыр-сырына тоқталды. Бұл процедурадан мүмкіндігінше ыңғайлы өту үшін, ең алдымен, салық қызметкерлері сіздің мүлкіңізге құқық белгілейтін құжаттарды ретке келтіруді ұсынады – тұрғын үй, автокөлік және т.б.
Салық төлеушінің қымбат мүлкі болса, оны тәуелсіз сарапшы бағалағаны дұрыс болар еді. Егер сізде несиелер болса, олар бойынша келісім-шарттарды нотариус куәландырған дұрыс.
Сонымен қатар, декларация тапсыруы тиіс әрбір адам Қазақстанда активтері мен міндеттемелерінің бар-жоғын өз бетінше тексере алады. Мұны келесідей жасауға болады:
• бағалы қағаздар үшін https://portal.kacd.kz;
• тұрғын үй құрылысына үлестік қатысу туралы шарттар бойынша https://homeportal.kz; https://www.gov.kz/services/3910?lang=ru;
• зияткерлік меншік объектілері бойынша, авторлық құқық https://gosreestr.kazpatent.kz;
• сенімгерлік басқаруға берілген мүлік үшін https://egov.kz/cms/ru/services/pass077_mu;
• несиелік келісімдер бойынша сіз Doculite жүйесі арқылы нысан бойынша Республикалық нотариаттық палатаға сұраныс жібере аласыз.
Декларацияны электронды түрде «Салық төлеушінің шоты», «Электрондық үкімет» порталы, сондай-ақ e-Salyq Azamat, eGov mobile мобильді қосымшалары, Halyk Bank, Kaspi және Bank Center Credit қосымшалары арқылы беруге болады. Декларация тұрғылықты жері бойынша беріледі. Декларацияны тапсырудың соңғы мерзімі – 15 қыркүйек.
Декларацияны ұсынбағаны үшін әкімшілік жауапкершілік қарастырылған. Декларацияны ұсынбаған немесе тапсыру мерзімін бұзған жағдайда ескерту беріледі, ал бір жыл ішінде қайталағаны үшін 15 АЕК көлемінде айыппұл салынады.
Активтер мен міндеттемелер туралы декларацияда, кірістер мен мүлік туралы декларацияда толық емес немесе сенімсіз мәліметтер көрсетілсе, ескерту жасалады. Бір жыл ішінде қайталап жасағаны үшін 3 АЕК көлемінде айыппұл салынады.
