Жаңадан таңдалған емханада пациенттер келесі жылдың 1 қаңтарынан бастап қызмет ала алады.
Емханаға ерікті түрде тіркелу бойынша жыл сайынғы науқанның қорытындысы @pavlodar.rsk алаңында шығарылды. Денсаулық сақтау басқармасының алғашқы медициналық-санитариялық көмек жөніндегі үйлестірушісі Айгүл Әбілхасанның айтуынша, науқан аясында Павлодар облысының 1024 тұрғыны емхананы ауыстыруды ұйғарған. Олардың 118-і мемлекеттік алғашқы медициналық-санитариялық көмек ұйымдарына, ал 906-сы жекеменшік ұйымдарға тіркелген.
Емхананы ауыстыру мүмкіндігі жылына бір рет 1 қыркүйек пен 1 қараша аралығында беріледі. Қызмет жеке өтініш білдіру арқылы немесе eGov.kz веб-порталы арқылы көрсетіледі. Науқан кезінде тіркелген пациенттер жаңа емханада келесі жылдың 1 қаңтарынан бастап қызмет ала бастайды.
