Бірыңғай байланыс орталығының атап өтуінше, барлық қоңыраулардың 95 пайызы сәтті өңделді.
109 қызметінің жұмысы туралы @pavlodar.rsk алаңында оның басшысы Абзал Қабдраш айтып берді. Ол барлық өтініштердің 90 пайызы Павлодар тұрғындарынан келетінін, ал ең азы Аққулы ауданынан түсетінін атап өтті. Әлеуметтік желілер арқылы келетін өтініштер саны артып келеді, алайда негізгі арна телефон қоңыраулары болып қалуда. 2024 жылы өтініштердің 87 пайызы 109 қысқа нөмірі арқылы қабылданған.
Облыс тұрғындары жиі коммуналдық сипаттағы мәселелер бойынша, сондай-ақ анықтамалық ақпарат алу және денсаулық сақтау мәселелері бойынша жүгінеді. Күн сайын өңірдің коммуналдық қызметтерімен электр және сумен жабдықтаудың жоспарлы және авариялық тоқтап қалулары бойынша ақпарат алмасу жүзеге асырылады. Жылумен жабдықтау бойынша апаттық жағдайлар тіркелген жоқ.
2020 жылдан бері жұмыс істеп келе жатқан 109 бірыңғай байланыс орталығы күн сайын түрлі сипаттағы 200-ден 800-ге дейін өтінішті өңдейді. 2025 жылы қызмет Генерал Дүйсенов көшесі, 80 мекенжайы бойынша жаңа ғимаратқа көшті. Бір шаңырақ астында енді барлық негізгі қызметтер жұмыс істейді, бұл өтініштерді өңдеудің жеделдігі мен сапасын арттыруға мүмкіндік берді.
