Бүгінгі таңда Павлодар облысы халқының 86%-ға жуығы міндетті әлеуметтік медициналық сақтандыру жүйесінде сақтандырылған.
2026 жылдан бастап күшіне енетін МӘМС жүйесіндегі өзгерістер туралы @pavlodar.rsk алаңында Әлеуметтік медициналық сақтандыру қорының өңірлік филиалының директоры Жангелді Шайымбетов айтып берді. МӘМС қамтуды кеңейтуге мүмкіндік беретін бірінші жаңалық жергілікті атқарушы органдардың жауапкершілігін арттыруға қатысты. Әлеуметтік әл-ауқаттың дағдарыстық және шұғыл деңгейлеріне жататын адамдар үшін жарналар жергілікті бюджет есебінен төленетін болады. Сонымен қатар, ресми тіркелген жұмыссыздар үшін де жарналар жергілікті бюджет қаражатынан жүргізіледі.
Сондай-ақ, жарналарды қатарынан кемінде бес жыл төлеген азаматтар төлемдерді уақытша тоқтата тұрған кезде алты ай бойы сақтандырылған мәртебесін сақтай алатын норма енгізіледі, – деді спикер. – Мысалы, егер адам жұмыспен қамтылып, осы уақыт бойы тұрақты түрде жарна төлеген болса, бірақ жұмысы мен табысынан айырылса, оған алты ай бойы МӘМС шеңберінде медициналық қызмет көрсетіледі.
2026 жылдан бастап барлық онкологиялық скринингтер тегін медициналық көмектің мемлекеттік көлемі тізбесіне өтеді және МӘМС жүйесінде сақтандырылу мәртебесіне қарамастан барлық азаматтар үшін тегін болады. 8 әлеуметтік маңызы бар ауруға күдік туындаған кезде консультациялық-диагностикалық көмек те тегін болады. МӘМС-тің базалық пакетіне амбулаторлық диализ, сондай-ақ консультациялық-диагностикалық көмек, амбулаторлық дәрі-дәрмекпен қамтамасыз ету, динамикалық бақылауға жататын 12 созылмалы аурулар тобы бойынша жоспарлы түрдегі стационарлық және стационарды алмастыратын көмек ауысады.
Тағы бір өзгеріс – халықтың жеңілдікті санаттарына кіретіндер үшін жарналар бойынша ставкаларды арттыру. Бұл аударымдар республикалық бюджеттен түседі. Оларды кезең-кезеңімен арттыру шаралары ұсынылады: 2027 жылы 2,2%-дан 2037 жылы 4,7%-ға дейін. Бұл ретте қызметкерлердің жарналары мен жұмыс берушілердің аударымдары өзгеріссіз қалады.
