Заң бұзушылықтардың көпшілігі тауарлардың таңбалануына қатысты.
Нарықты сапасыз өнімдерден қорғау жұмыстары туралы @pavlodar.rsk алаңында Санитариялық-эпидемиологиялық бақылау департаменті басшысының орынбасары Гүлнәр Ақылбекова хабарлады. Бірінші жартыжылдықта санитарлық дәрігерлер 1333 өнім сынамасын алды, оның ішінде 818 сынама тамақ өнімдерінен, ал 515-і тамақ емес өнімдерден алынған. Зертханалық зерттеулер тамақ өнімдерінің 90 сынамасынан, тамақ емес өнімдердің 340 сынамасынан сәйкессіздіктерді көрсетті.
«Жоғары сортты бидай ұнының екі сынамасынан физикалық-химиялық көрсеткіштер бойынша сәйкессіздіктер анықталды», — деді спикер. — «Мырыш мөлшері килограмға 7,5 мг болды, нормасы 20-30 мг. Темірге қатысты да солай: килограмға 42 мг, нормасы 45-65 мг. Тамақ емес өнімдердің екі сынамасынан физикалық-гигиеналық көрсеткіштер бойынша сәйкессіздіктер анықталды. Белгісіз өндірушінің «сквиш аю» ойыншығында ылғалды өңдеуге төзімсіздік байқалды. Ал қыздарға арналған ақ мектеп блузкасында – өндірушісі де белгісіз – гигроскопиялық қасиеті 0,9% болып, нормасы кемінде 7% болуы керек».
Эпидемиологтар 426 сынамадан таңбалау бойынша сәйкессіздіктерді тапты. Мысалы, тауарда мемлекеттік тілде ақпараттың болмауы, тамақ өнімінің құрамы туралы ақпараттың жоқтығы және т.б. Нәтижесінде, 2 миллион теңгеден астам сомаға 940 килограмға жуық түрлі өнім айналымнан алынды. Бақылау сатып алу барысында анықталған сәйкессіз өнімдер туралы өзекті ақпаратты тұтынушылар ҚР Денсаулық сақтау министрлігінің Санитариялық-эпидемиологиялық бақылау комитетінің сайтынан біле алады.
