Жыл басынан бері мамандардан көмек сұрағандардың саны 700-ден асты. Өткен жылы осы кезеңде бұл көрсеткіш 540 адамды құраған еді.
Бүкіл әлемде 2 сәуір – Аутизм мәселесі туралы ақпарат тарату күні ретінде аталып өтеді. Бұл күннің басты мақсаты – ерекше балаларды тәрбиелеп отырған отбасыларға қолдау көрсетудің маңыздылығын атап өту және олардың өмір сүру сапасын арттыру.
– Соңғы жылдары ата-аналардың балаларының аутизмін анықтау үшін кеңес алу жағдайларының өскенін байқаймыз, – дейді Павлодар облыстық психикалық денсаулық орталығының балалар психиатры Макпал Токаева. – Дүниежүзілік денсаулық сақтау ұйымының мәліметінше, бүгінде әрбір 100 баланың бірінде аутизм спектрінің бұзылуы белгілері байқалады. Бұл ретте аутизм – арнайы дамытушы және оқыту бағдарламаларының көмегімен түзетуге болатын жағдай екенін ұмытпау қажет. Ерте диагноз қою – баланың болашақ оңалту бағдарламасын дұрыс анықтауға мүмкіндік береді.
Аутизм спектрінің бұзылу белгілері қандай? Көзбен тікелей байланыс орнатпау, Аты аталғанда жауап бермеу, жымию және қимыл арқылы қарым-қатынас жасау қабілетінің төмендігі, сөйлеу және дыбыс шығару дағдыларының баяулығы, құрдастарымен араласуға құлықсыздық, заттарды қатарлап тізіп қоюға бейімділік, агрессия немесе өзін-өзі зақымдау, сұраныстарды орындамау, дыбыстық тітіркендіргіштерге жоғары сезімталдық. Аутизмді бастапқы диагностикалау үшін M-Chat-R онлайн тестінен өтуге болады. Алайда, оның нәтижелері тек ұсыныс сипатында екенін және нақты диагноз қою үшін міндетті түрде маманға жүгіну қажет екенін естен шығармау керек.
Аутизм туралы ақпараттандыру деңгейін арттыру мақсатында сәуір айы бойы психикалық денсаулық орталығында ашық есік күндері өтеді. Барлық консультациялар тегін.
