Бүгін қалада шұңқырларды жөндеу жұмыстары басталып кетті.
Облыс орталығын абаттандыру жоспары туралы @pavlodar.rsk алаңында Павлодар қаласы әкімінің орынбасары Ануарбек Аманов бөлісті. Оның айтуынша, қалада орташа жөндеу жүргізілетін 15 көше қарастырылған, бұл 43 шақырымнан астам жолды қамтиды. Олардың ішінде төрт жоба өткен жылдан бастап жүзеге асырылуда.
– Биылғы орташа жөндеу кезінде қиыршық тас-мастикалық асфальт қолданылатын болады, – деп атап өтті спикер. – Мұндай ұсынысты бізге былтыр Ұлттық жол активтері сапасы орталығының мамандары берді. Бұрын пайдаланылған ұсақ түйіршікті ыстық асфальтпен салыстырғанда, бұл асфальт тығыздау және оның физика-механикалық қасиеттері біздің климаттық жағдайымызға жақсырақ сәйкес келеді.
Алдағы жөндеу жұмыстары барысында қаладағы жеке секторда 22 көше мен 13 тротуар учаскесі ретке келтірілмек. Сонымен қатар, Лермонтов көшесін жаңғырту жалғасады. Бұдан бөлек, облыс орталығында Щербактин ауданына қарай көпір өткелінің маңында орналасқан автодромның күрделі жөндеуі жүргізіледі.
