Өткен жылы бұл көрсеткіш 245 мың гектардан сәл асқан болса, алдағы көктемгі маусымда оны 304 мың гектарға дейін жеткізу жоспарланып отыр.
Көктемгі дала жұмыстарына дайындық туралы @pavlodar.rsk алаңында ауыл шаруашылығы басқармасының басшысы Дархан Дощанов баяндады. Жалпы, 2025 жылы ауыл шаруашылығы дақылдарының болжамды егіс алқабы 1,69 миллион гектарды құрайды. Бұл өткен жылмен салыстырғанда 123 мың гектарға артық. Дәнді дақылдар 953 мың гектарға, майлы дақылдар 395 мың гектарға егіледі.
– Сонымен қатар, жергілікті жерде берік мал азықтық базасын қалыптастыру жұмыстары жүргізілуде, – деді спикер. – Осы мақсатта мал азықтық дақылдардың егіс алқабын кеңейтіп, оны 304,3 мың гектарға дейін жеткізу жоспарланып отыр.
Льготты жанармаймен қамтамасыз етуге келсек, көктемгі егіс науқаны үшін өңірге 27,6 мың тонна арзандатылған дизель отыны бөлінді. Агротехникалық жұмыстарды сәуір айының бірінші жартысында бастау көзделіп отыр.
