Өңірде жұмыс істейтін үш монополист тиісті өтінімдерін берді.
Үкімет деңгейінде бекітілген «Энергетика және коммуналдық секторды жаңғырту» ұлттық жобасы алдағы бес жылға есептелген. Ол энергетикалық желілерді, сумен жабдықтау және су бұру жүйелерін жаңартуға, сондай-ақ жаңартылатын энергия көздерін дамытуға бағытталған. Бұл туралы @pavlodar.rsk алаңында табиғи монополияларды реттеу департаментінің басшысы Нұрлан Нұрмұратов мәлімдеді.
– Ұлттық жоба инфрақұрылымның тозуын кезең-кезеңімен төмендетуді қарастырады, – деді спикер. – Жылу жүйесінде 53%-дан 40%-ға, электрмен жабдықтауда 62%-дан 45%-ға, сумен жабдықтауда 39%-дан 34%-ға дейін. Бұл ресурстарды тұрақты жеткізуге, жылу мен судың тасымалдау кезіндегі шығындарын азайтуға, сондай-ақ желілерді пайдалану қауіпсіздігін арттыруға мүмкіндік береді.
Жаңғыртуды қаржыландыру әртүрлі механизмдер арқылы жүзеге асырылады. Бұл – мемлекеттік субсидиялар, жеке инвестицияларды тарту, облигациялық қарыздар және банк несиелері. Сондай-ақ тарифтердің күрт өсуіне жол бермеу үшін арнайы шаралар қарастырылған, осылайша инфрақұрылымды жаңарту халық үшін коммуналдық қызметтердің бағасының айтарлықтай қымбаттауына әкелмейді. Жобаны іске асырғаннан кейін апаттық жағдайлардың шамамен 20%-ға азаюы күтіледі. Бұл үздіксіз қамтамасыз етуді жақсартып, өңір тұрғындарының өмір сапасын арттыруға мүмкіндік береді.
Павлодар облысында Ұлттық жобаға қатысуға үш кәсіпорын дайын – «Павлодар жылу желілері» ЖШС, «Павлодар тарату электр желілік компаниясы» АҚ және Екібастұз қаласының «Горводоканал» ШЖҚ КМК. Қазіргі уақытта олардың өтінімдерін «ҚазОрталық ТКШ» АҚ техникалық оператор ретінде қарастырып жатыр. Ал Ұлттық жобаның қаржылық операторы – «Бәйтерек» ұлттық басқарушы холдингі.
