Өңірде білім беру мекемелері жанында 123 қаркасты-модульдік бассейн жұмыс істейді.
Павлодар облысында судағы қайғылы жағдайларды алдын алу жұмыстары жалғасуда. Бүгінгі таңда Төтенше жағдайлар департаментінің мамандары жұмыс істеп тұрған 47 жағажайдың барлығын тексерді, алайда олардың алтауы әлі жұмыс істемейді.
• Біз жыл сайын коммуналдық және жеке жағажайларда жұмыс істеу үшін қоғамдық құтқарушыларды дайындаймыз, – деді ТЖД Азаматтық қорғаныс басқармасы бастығының орынбасары Ерлан Қасымов. – Биыл 85 құтқарушы оқытылды. Сондай-ақ, біз балаларды суда жүзуге үйретуді жалғастырамыз. Жыл басынан бері 6,1 мың оқушы оқытудан өтті.
Құтқарушылардың еске салуынша, адамдар көбінесе шомылуға тыйым салынған жерлерде суға батады. Сондықтан, өңір аумағында су айдындарының жанына 240 тыйым салатын белгі және 18 ескерту баннері орнатылған. Бұдан басқа, Павлодарда 45 тыйым салатын белгіге QR-кодтар орналастырылды. Ол арқылы учаскенің сипаттамасын білуге болады.
