Жер бедері төмен 36 елді мекен ерекше бақылауға алынды.
Аймақтағы жағдай туралы @pavlodar.rsk алаңында Павлодар облысы әкімінің бірінші орынбасары Серік Батырғожинов баяндады. Оның айтуынша, бүгінгі күнге дейін қалалар мен ауылдардан 700 мың тоннадан астам қар шығарылған.
– Жергілікті және республикалық маңызы бар жолдардағы барлық су өткізгіш құбырлар ашылды, – деді спикер. – Өткен жылғы су тасқынын ескере отырып, көктемгі су басу қаупі жоғары елді мекендер тізімі қайта қаралды. Оған 36 ауыл енгізілді.
Ақтоғай ауданының Жалаулы ауылына келетін болсақ, онда қауіп сейілді. Өткен жылғы су басудан кейін мұнда үш су жинайтын шұңқыр мен екі су ағызатын арық салынды. Сондай-ақ, өңірде Селеті өзенінде мұз жару және оны ұсақтау жұмыстары жүргізілді.
Үлкен су тасқыны болған жағдайда Павлодар облысында 2,4 мыңға жуық адам мен 700-ден астам түрлі техника дайын тұр. Жалпы, өңірдегі су тасқыны жағдайы тұрақты деп бағаланады.
