Су шаруашылығы кәсіпорнының өкілдері бұл жағдайда елді мекендерді су басу қаупі жоқ екенін мәлімдеді.
Қажетті дайындықты павлодарлық «Қазсушар» мамандары өткен жылы бастаған. Ең алдымен, аймақтық филиалға қарасты су шаруашылығы нысандарындағы гидравликалық жүйенің жағдайы тексерілді. Олардың қатарына Май және Беловод топтық су құбырлары, Қалыбаев лимандық массиві, сондай-ақ, Щидерті су құбыры трассасы мен Щидерті магистральдық каналы кіреді.
– Щидерті трассасы мен магистральдық канал арқылы Екібастұз бен Ақтоғай ауданының ауылдық аймағындағы 21 мың гектардан астам лимандарды толтыру үшін табиғатты қорғау мақсатында су жіберіледі, – деді РМК «Қазсушар» Павлодар филиалының басшысы Арман Оспанов. – Сонымен қатар, канал арқылы Екібастұз ГРЭС-2 қажеттіліктеріне су жеткізіледі. Биыл Щидерті су құбыры трассасы мен Щидерті магистральдық каналы бойынша жоспарлы су жіберу көлемі шамамен 120 миллион текше метрді, ал электр станциясына – 66,5 миллион текше метрді құрайды.
Иртыш өзені бойында орналасқан Қалыбаев лимандық массивін толтыру үшін шамамен 60 миллион текше метр су қажет. Егер Щидерті арқылы табиғатты қорғау мақсатындағы су жіберу бірнеше күн ішінде басталатын болса, аймақтың басты өзені арқылы су жіберу сәуір айының бірінші онкүндігінде жүзеге асырылмақ. Спикердің айтуынша, Павлодар филиалына қарасты нысандарда елді мекендерді су басу қаупі жоқ.
