Бұрын кәсіпкерлер ескерту арқылы құтыла алса, енді заң бұзушылық расталған жағдайда оларға айыппұл салынады.
Әкімшілік құқық бұзушылық туралы кодекске әлеуметтік маңызы бар азық-түлік тауарларына сауда үстемесін асыруға қатысты енгізілген өзгерістер 13 наурыздан бастап күшіне енді. Бұл туралы @pavlodar.rsk алаңында Сауда және тұтынушылардың құқықтарын қорғау департаментінің басшысы Даулен Кабдушев еске салды.
– Бұрын заң бұзушылық анықталған жағдайда ескерту беретін едік, енді бірден айыппұл салынады, – деді спикер. – Оның мөлшері кәсіпкерлік субъектісінің санатына байланысты 5-тен 150 айлық есептік көрсеткішке (АЕК) дейін өзгереді. Сондай-ақ тұтынушы шағымына уақытында жауап бермеу, тауарды қайтару немесе айырбастауды қамтамасыз етпеу, сатушы туралы ақпарат бермеу үшін жаза күшейтілді – бұл үшін 5-тен 20 АЕК-ке дейін айыппұл қарастырылған.
2025 жылдың қаңтар-ақпан айларында департамент қызметкерлері әлеуметтік маңызы бар азық-түлікке сауда үстемесін асыруға қатысты 30-дан астам жоспардан тыс тексеру жүргізді. Олардың 23-інде картопқа сауда үстемесі шектен тыс болғаны анықталды. Ең жоғары үстеме 106%-ды құрады – павлодарлық дистрибьютор картопты 160 теңгеден сатып алып, оны 330 теңгеден сатқан.
Фото нейрожелі арқылы жасалған
