15 қыркүйектен бастап Қазақстанда кондоминиум объектілерін басқарудың екі нысаны ресми түрде бекітілді: Мүлік Иелерінің Бірлестігі (МИБ) және Тікелей Бірлесіп Басқару (ТББ).
Бұл жаңашылдықтар көппәтерлі тұрғын үйлерді басқаруды жеңілдетуге, жүйелеуге, сондай-ақ бұл саладағы ашықтық пен кәсібилікті арттыруға бағытталған. Павлодар қаласының тұрғын үй инспекциясы және коммуналдық шаруашылық бөлімі басшысының орынбасары Бақытгүл Базылованың айтуынша, МИБ төрағасының өкілеттік мерзімі үш жылға дейін ұзартылды. Бұдан басқа, ол үй кеңесінің мүшесі болып, шешім қабылдауға қатысуын күшейтеді.
Басқару нысанын – МИБ немесе ТТБ – таңдау пәтер санымен шектелмейді. Егер үйде 36-дан астам пәтер және тұрғын емес үй-жайлар болса, меншік иелері жиналыс хаттамасының негізінде кәсіби басқарушыны тартуға міндетті. Бұл рөлде заң күшіне енгенге дейін тіркелген басқарушы компаниялар мен пәтер иелері кооперативтері (ПИК) бола алады. 2025 жылғы 15 шілдеге дейін жұмыс істеп тұрған барлық кооперативтер заң ресми жарияланған сәттен бастап бір жыл ішінде қайта тіркеуден өтуге міндетті.
Басқарушы компаниялар кондоминиум объектілерінің ортақ мүлкін МИБ төрағасымен жасалған шарттың немесе жалпы жиналыс хаттамасының негізінде басқара алады. Олар штатта растаулы кәсіби біліктілігі бар қызметкерлерді ұстауға міндетті. Басқару МИБ-пен жасалған шарттың немесе жиналыс хаттамасының негізінде жүзеге асырылады, содан кейін екінші деңгейдегі банктерде ағымдағы және жинақтау шоттары ашылады. Жинақтау шотындағы қаражат тек жиналыс шешімімен ғана жұмсалуы мүмкін. Сондай-ақ меншік иелері мақсатты жарналар туралы, олардың мөлшері мен мерзімдері туралы шешім қабылдауға құқылы, мұны хаттамамен бекітеді.
Егер меншік иелері екі ай ішінде басқару нысаны немесе басқарушыны таңдау туралы келісімге келе алмаса, немесе тиісті хаттамамен тұрғын үй инспекциясына жүгінсе, инспекция уақытша басқарушы компанияны тағайындайды. Ол меншік иелері шешім қабылдағанға дейін басқару функцияларын орындайды, 15 күнтізбелік күн ішінде шоттарды ашуға міндетті және инспекциямен жасалған шарт негізінде жұмыс істейді.
