Өңірдегі білім беру ұйымдарының базасында 600-ге жуық шахмат секциясы жұмыс істейді.
Бірнеше жылдан бері бүкіл Қазақстан бойынша «Білім берудегі шахмат» пилоттық жобасы жүзеге асырылып келеді. Осы жоба аясында Павлодар облысының 75 мектебінде «Шахмат негіздері» факультативтік курсы ашылды. Сабақтар 121 сыныпта ұйымдастырылып, бастауыш сыныптың екі мыңнан астам оқушысын қамтып отыр. Дәрістер аптасына бір рет өтеді. Шахматтан арнайы оқыту бағдарламасынан өткен 142 педагог сабақ береді.
Пилоттық жобамен қатар өңірде бұқаралық мектептік шахмат қозғалысы да белсенді дамып келеді. 340 мектепте 592 шахмат секциясы жұмыс істейді, онда 13 мыңнан астам бала айналысады. Бұл оқушылардың мамандандырылған білім беру жобаларына қатысу-қатыспауына қарамастан, оларды интеллектуалды спортқа тартып, қамтуға мүмкіндік береді. Өңірде жыл сайын шахматтан турнирлер мен олимпиадалар, сондай-ақ Ұлттық мектеп лигасының жарыстары өткізіліп тұрады. Мектепішілік іріктеу кезеңдерінен басталатын жарыстардың түрлі сатыларына 7,5 мыңнан астам оқушы қатысады.
