Құқықтық статистика және арнайы есепке алу департаментінің өкілдері жерлестерді www.qamqor.gov.kz сайтының мүмкіндіктерін белсендірек пайдалануға шақырды.
@pavlodar.rsk алаңында басқарма басшысының м.а. Жәнібек Кенжебаевтың айтуынша, бүгінгі күні қадағалау органдары мемлекеттік статистикалық есептіліктің 26 түрін және арнайы есепке алудың 24 түрін жүргізеді. 2017 жылдан бастап прокуратура кез келген қазақстандық зерттеп, талдай алуы үшін қолжетімді деректерді арнайы қызметтер мен цифрлық карталарға жинақтауда. Бүгінде www.qamqor.gov.kz порталында 20-ға жуық түрлі сервистер мен геокарталар бар. Мәселен, кәсіпкерлер өздеріне келген тексерудің заңдылығын, тіркелуін тексеріп, кез келген адам оларға әкімшілік айыппұл салынғанын біле алады.
«Халықтың сұранысы негізінде Qamqor жаңа қызметтермен жаңартылуда», – деді Жәнібек Кенжебаев. – Мысалы, биылғы жылы сайтта құқық қабілеттілігі туралы ақпаратты табуға көмектесетін сервис енгізілді. Бізге осындай сұраныстар жаппай түсе бастады, сондықтан осы деректермен өз бетінше жұмыс істеу және ақпаратты жылдам алу қызметін іске қосу туралы шешім қабылданды.
Егер географиялық деректерге тоқталатын болсақ, Qamqor порталында полицияда тіркелген қылмыстардың орналасқан жерлерін көрсететін «Қылмыс картасы» бар. «Апат картасынан» сіз белгілі бір елді мекендегі жолдардың ең қауіпті учаскелерін біле аласыз. Веб-сайтта тіпті «Кәсіпкерлерді тексеру картасы» бар, онда субъектілердің мекенжайлары мен тексеру нәтижелері туралы ақпарат көрсетілген.
