Скринингтік тексерулерді МӘМС жүйесінен тегін медициналық көмектің кепілдік берілген көлемі пакетіне ауыстырғаннан кейін, өңірде онкологиялық скринингтермен қамту көрсеткіші шамамен 20%-ға өсті.
Павлодарлық дәрігерлер онкологиялық ауруларды ерте диагностикалау мен скринингтердің маңыздылығын тағы бір мәрте еске салды. Жыл басынан бері облыстық онкологиялық диспансерде 631 жаңа пациент есепке алынды. Жағдайлардың 60%-дан астамында ауру бірінші және екінші кезеңдерде анықталған. Ал асқынған жағдайлардың үлесі шамамен 9%-ды құрады.
– Бұл ерте диагностиканың жақсарғанын және пациенттердің өз денсаулығына деген ортақ жауапкершілігін көрсетеді, – деп атап өтті өңірлік онкологиялық диспансер басшысының орынбасары Әсел Асқарова @pavlodar.rsk алаңында өткен брифингте. – Бүгінде Қазақстанда скринингтің үш бағдарламасы қолжетімді: сүт безі қатерлі ісігін, колоректальды қатерлі ісікті және жатыр мойны қатерлі ісігін анықтау. 2026 жылдан бастап бұл тексерулерден өту үшін МӘМС жүйесіндегі сақтандыру мәртебесі маңызды емес. Бұдан бөлек, тексеруден өтудің жас шегі ұлғайтылды: жатыр мойны қатерлі ісігі бойынша 70-тен 74 жасқа дейін, ал сүт безі және колоректальды қатерлі ісік бойынша 76 жасқа дейін.
Жыл басынан бері өңірде аталған скринингтерден 55 мыңнан астам адам өтті. Осы жұмыс аясында онкологиялық аурудың 43 жағдайы анықталды. Жалпы, онкодиспансерде 14 мыңға жуық пациент есепте тұр. Айта кетерлігі, Павлодар облысы ұзақ уақыт бойы қатерлі ісік ауруы бойынша көшбасшылар қатарына кірмейді және республикада бұл көрсеткіш бойынша бесінші орында тұр. Фото: Gemini
