Өңірде өндірістік жарақаттануды азайту, қауіпсіздік мәдениетін арттыру және мемлекеттік бақылауды жетілдіру бағытындағы жұмыстар жалғасуда.
@pavlodar.rsk алаңында Павлодар облыстық мемлекеттік еңбек инспекциясы департаменті басшысының орынбасары Абылай Сабыров еңбек қауіпсіздігі және оны қорғау саласындағы ахуал туралы баяндады. Ол жыл басынан бері өңірде тағы 7 кәсіпорынның «Vision Zero» нөлдік жарақаттану тұжырымдамасын енгізгенін атап өтті. Бұл модель жұмыс берушілердің жауапкершілігін арттыру және жұмыскерлердің қауіпсіз мінез-құлық мәдениетін қалыптастыру арқылы жазатайым оқиғалардың алдын алуға бағытталған.
– Сонымен қатар, 22 кәсіпорында «Халықтық бақылау» жобасы іске асырылуда. Ол бұрын өндірістік жарақат алған жұмыскерлерді еңбек жағдайларын ішкі бақылау процестеріне тартуды көздейді, – деді спикер. – Бұл тәжірибелік білімді ескеруге және алдын алу шараларын тікелей жұмыс орындарында күшейтуге мүмкіндік береді. Сондай-ақ облыста 881 өндірістік кеңес жұмыс істейді, олардың қызметі тәуекелдерді анықтауға, еңбек қорғау талаптарының сақталуын бақылауға және ықтимал қауіптерге жедел әрекет етуге бағытталған.
Еңбекті қорғау саласындағы сарапшылар тәуекелдерді ерте анықтаудың негізгі құралдарының бірі ретінде Еңбек тәуекелдерінің цифрлық картасын атайды. Бұл жүйе мемлекеттік ақпараттық ресурстармен интеграцияланған және жазатайым оқиғалардың орын алу ықтималдығы жоғары кәсіпорындарды автоматтандырылған режимде анықтауға мүмкіндік береді. Бүгінгі таңда Павлодар облысы бойынша 18 мыңнан астам түрлі кәсіпорын цифрлық мониторингпен қамтылған.
Скорингтік модель негізінде кәсіпорындар тәуекел деңгейіне қарай (жоғары, орташа, төмен) жіктеледі, бұл бақылаудың сараланған тәсілін құруға мүмкіндік береді. Павлодар облысында 152 кәсіпорын мониторингте тұр, оның ішінде 61-і жоғары тәуекел тобына, ал 91-і орташа тәуекел тобына жатқызылды. Осы кәсіпорындарға қатысты профилактикалық және бақылау шаралары күшейтілді.
Фото: Gemini
