Дәстүрлі мұсылман мерекесі үш күн бойы — мамырдың 27-сі мен 29-ы аралығында атап өтіледі.
Құрбан айт өңірдегі барлық мешіттерде таңғы мерекелік айт намазымен басталады. Мәшһүр Жүсіп атындағы Орталық мешіттің бас имамы Жолдас қажы Бердімұратұлының мәлімдеуінше, намаздың басталу уақыты — сағат 06:00.
Нұрлы құлшылықтан кейін ниет білдірушілер құрбандық шалу рәсімін өткізе алады. Павлодар қаласында бұл мақсат үшін барлық қажетті санитарлық және ветеринарлық жағдайлармен қамтамасыз етілген «Құлагер» ипподромының аумағы белгіленді. Құрбандық малдарын союға арналған арнайы орындар аймақтың барлық қалалары мен аудандарында ұйымдастырылған. Сондай-ақ Қазақстан мұсылмандары діни басқармасы іске қосқан www.qurban.muftiyat.kz сайты арқылы құрбандық шалу рәсімін қашықтан (онлайн) жүргізуге болады.
Сонымен қатар, 27 мамыр күні Құрбан айт мерекесіне орай Мәшһүр Жүсіп атындағы мешіт аумағында спорттық жарыстар ұйымдастырылады. Мерекелік іс-шараларды сағат 14:00-де бастау жоспарланып отыр.
Фото: ChatGPT
