Жыл басынан бері аймақта отбасылық-тұрмыстық қатынастар саласында 130-дан астам құқық бұзушылық тіркелді.
Отбасылық-тұрмыстық зорлық-зомбылықтың алдын алу туралы @pavlodar.rsk алаңында отбасылық-тұрмыстық зорлық-зомбылықпен күрес бөлімінің аға инспекторы Индира Жүсіпова айтып берді. Облыста тұрмыстық саладағы қылмыстардың аздаған өсімі тіркелді – өткен жылмен салыстырғанда 2,3%-ға.
– Отбасылық-тұрмыстық зорлық-зомбылық жасаудың негізгі себептерінің және жағдайларының бірі – алкогольді ішімдіктерді шамадан тыс тұтыну, – деп атап өтті полиция департаментінің спикері. – Талдауға сәйкес, 60 қылмыс алкогольді ішімдіктерді ішу кезінде және қызғаныш пен әлеуметтік қанағаттанбаушылық негізінде кенеттен туындаған жанжалдар кезінде жасалған. 132 қылмыстың 82-сін жұмыссыздар жасаған.
Павлодар облысында агрессорларға психологиялық көмек көрсету жарты жылдан астам уақыт бойы жүргізілуде. Полиция органдарының өтініші бойынша сот 40 агрессорға міндетті түрде психологиялық көмек көрсетуді тағайындады, оның 10-ы емдеу курсын аяқтады. Және талдау көрсеткендей, олар қайталама құқық бұзушылықтар жасамайды.
Бүгінде тұрмыстық зорлық-зомбылықтан зардап шеккендерге көмекті Павлодар қаласының Жұмыспен қамту және әлеуметтік бағдарламалар бөлімінің «Дағдарыс орталығы» КММ, «Ана үйі» қоғамдық қоры (баспанасымен) және «Қорғау Астана» жеке қоры көрсетеді. Отбасылық-тұрмыстық зорлық-зомбылыққа тап болған барлық азаматтар полиция органдарына 111, 150 сенім телефондары арқылы және 102 арнасына қоңырау шалу арқылы, сондай-ақ Павлодар қаласы, Северная Промзона, 258 мекенжайы бойынша Отбасылық-тұрмыстық зорлық-зомбылықпен күрес бөліміне жеке өзі келіп көмек сұрай алады. Бұдан басқа, @7_police_pvl Instagram әлеуметтік желісіндегі парақшаға тікелей хат жазуға болады.
