Әлеуметтік-еңбек саласындағы жаңашылдықтар туралы @pavlodar.rsk алаңында Павлодар облысының Жұмыспен қамтуды үйлестіру және әлеуметтік бағдарламалар басқармасының өкілдері айтып берді.
2026 жылғы 1 қазаннан бастап Қазақстанда азаматтарды есепке ресми түрде қоюдан оларды нақты әрі жедел жұмысқа орналастыруға көшуге бағытталған пилоттық жоба басталады. Негізгі жаңашылдық — бос жұмыс орындарын таңдау мерзімін ұзарту: азаматқа ресми жұмыссыз мәртебесі берілгенге дейін мансап орталықтарына бұрынғы екі күннің орнына 13 күн бөлінеді. Осы кезеңде жұмыс іздеуші «Жұмыс іздеп жүрген адам» мәртебесінде болады. Қосымша уақыт мамандарға терең бейіндеу жүргізуге, ізденушінің дағдыларын бағалауға, жеке мансаптық бағытты құруға және жұмыс берушілермен тікелей байланыс арқылы жұмыс таңдауға мүмкіндік береді. Пилоттық жоба аясында мансап орталықтары мен Мемлекеттік әлеуметтік сақтандыру қорының қызметкерлері жаңа алгоритмдер бойынша арнайы оқытудан өтеді.
Пилоттық жобаны іске асыру кезеңінде жұмысынан айырылу бойынша әлеуметтік төлемдер бұрынғы тәртіппен төленеді. Социалдық кодекске осы төлемдерді алудың ең ұзақ мерзімін үш айға дейін шектейтін түзетулер 2027 жылғы 1 қаңтардан бастап күшіне енеді.
Сонымен қатар, 2027 жылдан бастап атаулылық пен мұқтаждық қағидаттарына негізделген әлеуметтік төлемдерді тағайындаудың жаңа тәртібі күшіне енеді:
- Жоғары табысы бар санаттарды шектеу: ал ауқаттылық деңгейі жоғары («А» және «Б») санаттарына жатқызылған отбасыларға мемлекеттік төлемдер берілмейді.
- Табысты кешенді бағалау: отбасының нақты мұқтаждығы туралы толық мәлімет алу үшін оның барлық кәмелетке толған мүшелерінің деректері ескеріледі.
- Деректерді өңдеуге СМС-келісім: әрбір әлеуетті алушыға отбасы мүшелерінің дербес деректерін өңдеуге келісім беру туралы өтінішпен СМС жіберіледі.
- Өз еркімен бас тарту: табысы жоғары отбасылар арнайы СМС-ке жауап ретінде мемлекеттік қолдауды бұдан да қиын өмірлік жағдайда жүргендерге бағыттай отырып, әлеуметтік қолдау шараларынан өз еркімен бас тарта алады.
Реформа әлеуметтік қолдау жүйесін әділетті етуге және мемлекеттік ресурстарды шынымен де мұқтаж азаматтар мен отбасыларға бағыттауға арналған.
Фото: ChatGPT
