Үш айлық дайындықтан кейін 17 мерзімді әскери қызметші Шығыс Қазақстан облысындағы шекара заставаларының біріне жіберіледі.
Осы жылдың көктемінде Павлодар облысынан түрлі әскер түрлері мен әскери құрылымдарға 704 адамды шақыру жоспарлануда. Бұл туралы @pavlodar.rsk алаңында өңірлік Қорғаныс істері жөніндегі департамент бастығының орынбасары Қуат Жақанов мәлімдеді. Павлодарлық шақырылушылардың басым бөлігі Қарулы Күштер мен Ұлттық ұланға жіберіледі — тиісінше 380 және 240 адам. Тағы 50 сарбаз Ұлттық қауіпсіздік комитетінің Шекара қызметінде, 25-і Төтенше жағдайлар министрлігінде, 9-ы Мемлекеттік күзет қызметінде борышын өтейді.
– Көктемгі шақырылушылардың 17 адамнан тұратын алғашқы тобын Қарасай ауылына аттандырдық, онда олар үш ай бойы байланысшы, кинолог және аспаз мамандықтары бойынша оқудан өтеді, – деді спикер. – Кейін жігіттер қызметін Шығыс Қазақстан облысының Күршім ауданында жалғастырады. Шекара қызметі желісі бойынша қалған сарбаздар да сол жаққа жіберілетін болады.
Соңғы жылдары Қорғаныс істері жөніндегі департамент өкілдері павлодарлық топтың барлығы бір әскери бөлімге түсуі үшін шақырылушыларды бөлу жұмыстарын осылай жүргізуге тырысуда. Мысалы, өткен жылы Ақсу қаласынан келген мерзімді қызметтегі сарбаздар тобы Жетісу облысының Сарыөзек ауылындағы әскери бөлімге дәл осы тәртіппен жіберілген болатын.
