Ақтоғай ауданында бір орталықтандырылған және алты жеңілдетілген су құбыры пайдалануға берілуі тиіс. Бұл халықтың сапалы ауыз сумен қамтылуының 100 пайыз көрсеткішін қамтамасыз етеді.
Өңірлік коммуникациялар қызметінің алаңында Ақтоғай ауданының әкімі Қаршыға Арынов өңірдегі әлеуметтік-экономикалық даму барысына тоқталды. Агроөнеркәсіптік кешен мен кәсіпкерлікті қолдау мәселелерімен қатар, ауылды сумен қамту жағдайына да тоқталды.
– 31 елді мекеннің 12-сі орталықтандырылған сумен, тағы 18-і блокты модульдерден сумен қамтамасыз етілсе, тек Жаңатап ауылында бүгінде орталықтандырылмаған суды пайдалануда, – деді аудан басшысы. – Биыл 7 су құбырының құрылысы басталды. Жалаулы ауылында орталықтандырылған су құбыры жүргізілсе, Жаңатап, Жамбыл, Барлыбай, Шолақсор, Жоламан, Шұға ауылдарында тағы алты жеңілдетілген су құбыры салынуда. Бұл жобалар жүзеге асқанда облыстағы тұрғындардың сапалы ауыз суға қолжетімділігі 100 пайызды құрамақ.
Әкім жаңадан тартылған су құбырларының үзіліссіз, тұрғындардың арыз-шағымсыз жұмыс істемейтінін жасырмады. Жуырда ғана Мүткенова ауылының тұрғындары судың сапасына шағымданған болатын. Қазір оны мамандар бағалап жатыр. Сонымен қатар, Қаршыға Арынов аудан басшылығы Ақтоғайға қарай Беловод топтық су құбырын одан әрі тартуды талап етіп отырғанын баса айтты. Бұл жергілікті тазарту құрылыстарымен қамтамасыз ету шығындарын азайтып, тіпті ең сирек қоныстанған ауылдарды орталықтандырылған сумен жабдықтауға қосуға мүмкіндік береді.
