«Павлодар жылу желілері» ЖШС-де жылумен жабдықтау жүйесін ауқымды жаңғырту жұмыстары жалғасуда.
Облыс орталығындағы жаңа жылыту маусымына дайындық жұмыстары туралы @pavlodar.rsk ұйымдастырған пресс-тур барысында «Павлодар жылу желілері» ЖШС бас инженерінің пайдалану жөніндегі орынбасары Жанат Семенов айтып берді. Биыл кәсіпорында орталық жылу пункттерін реконструкциялауға кірісті. Солардың бірі — Назарбаев мен Толстой көшелерінің қиылысы ауданындағы №69 ОЖП-да құрылыс-монтаждау жұмыстары іс жүзінде аяқталды. Қазіргі уақытта мамандар объектіні іске қосу-реттеу жұмыстарымен айналысуда. Жалпы алғанда, қаладағы барлық 23 ОЖП-ны 2020 жылдың соңына дейін жаңғырту жоспарланған.
Желілерге келетін болсақ, биыл «Павлодар жылу желілері» ЖШС күшімен 3 шақырымға жуық жылу тасымалдау құбырлары жөнделді. Жұмабаев көшесінде бүгінде 600 метрден астам желіні қайта жаңартудан кейін абаттандыру жұмыстары жүргізілуде. Бұл жағдайда жылумен жабдықтау жүйесінің жақсарғанын төрт көпқабатты үйдің және 200-ге жуық жеке үйдің тұрғындары сезінуі тиіс.
Кәсіпорынның инвестициялық бағдарламасының бөлек бағыты — жылу инфрақұрылымын цифрландыру. ЖШС гидравликалық модельді құру арқылы геоақпараттық жүйе базасында инженерлік желілердің цифрлық егізін енгізуде. Бұл шешім жылу желілерінің бірыңғай цифрлық моделін құруға, олардың жай-күйін жедел талдауға, жұмыс параметрлерін бақылауға және өзекті деректер негізінде шешімдер қабылдауға мүмкіндік береді.
